Türkmənabad şəhərindəki ahıllara və sağlamlıq imkanları məhdud şəxslərə sosial xidmət müəssisəsində əhalinin sosial müdafiəsi, dəstəyə ehtiyacı olan vətəndaşlara yardımın göstərilməsi, o cümlədən sosial xidmətlərin səmərəliliyinin artırılması məsələlərinə həsr olunmuş treninq-seminar keçirilib.
Seminarda Aşqabad şəhərində və ölkənin bütün vilayətlərində müvafiq sahədə çalışan mütəxəssislər iştirak ediblər. Təcrübə mübadiləsi, qabaqcıl təcrübənin öyrənilməsi və idarələrarası əməkdaşlığın inkişaf etdirilməsi məqsədilə təşkil olunan tədbirdə əhalinin həyat səviyyəsinin yüksəldilməsi, sosial dəstəyə ehtiyacı olan insanlara qayğı göstərilməsi istiqamətində həyata keçirilən tədbirlərdən ətraflı söhbət açılıb.
Seminarda Türkmənistanın Əmək və Əhalinin Sosial Müdafiəsi Nazirliyinin şöbə müdiri Şemşat Abdyeva evdə sosial xidmətin təşkili, o cümlədən bu xidmətlərdən istifadə edən insanların müstəqil həyat tərzinin dəstəklənməsi istiqamətində görülən işlər barədə məruzə ilə çıxış edib. O, sosial xidmətlərin əlçatanlığının təmin edilməsinin və vətəndaşların gündəlik həyatda lazımi dəstəyi almasına köməklik göstərilməsinin vacibliyini vurğulayıb.
Həmçinin Türkmənabad şəhəri Ahıllara və Sağlamlıq imkanları məhdud şəxslərə sosial xidmət müəssisəsinin sədri Oğulqurban Orazmiradova qurumun iş təcrübəsindən, onun xidmətlərindən istifadə edən insanların həyat şəraitinin yaxşılaşdırılması istiqamətində həyata keçirilən tədbirlərdən danışıb.
Təlim seminarında qabaqcıl təcrübə mübadiləsi ilə yanaşı, sosial xidmətlərin təkmilləşdirilməsinə, dəstəyə ehtiyacı olan vətəndaşlara yardımın daha səmərəli təşkilinə xüsusi diqqət yetirilib.
Belə tədbirlər mütəxəssislərin peşə təcrübəsinin zənginləşməsinə, qarşılıqlı əməkdaşlığın gücləndirilməsinə və əhaliyə göstərilən sosial xidmətlərin keyfiyyətinin yüksəldilməsinə kömək edir.
