Türkmənistanın Tikinti və Memarlıq Nazirliyi Türkmənistan və Əfqanıstan sərhədində, Lebap vilayətinin Kərkin etrapında yerləşən İmamnəzər gömrük məntəqəsinin yenidən qurulması üzrə tikinti işlərinin aparılması üçün tender elan edib. Bu barədə “Türkmənistan” qəzeti məlumat yayıb.
Tender sərhəd gömrük məntəqəsinin infrastrukturunun müasirləşdirilməsinə yönəlib. “İmamnəzər” Türkmənistan və Əfqanıstan arasında ticarət-iqtisadi əlaqələr, eləcə də transsərhəd nəqliyyat və logistika dəhlizləri üçün mühüm əhəmiyyət kəsb edən obyektlərdən biridir.
Tenderdə iştirak etmək istəyən maraqlı şəxslərin ərizə və təklifləri Türkmənistan Tikinti və Memarlıq Nazirliyinin Bazar araşdırmaları və Xarici İqtisadi Əlaqələr Departamentində müəyyən edilmiş qaydada qəbul edilir və rəsmiləşdirilir.
Tender sənədlərinin təqdim edilməsi üçün son son tarix 24 noyabr 2026-cı ildir.
İmamnəzər gömrük məntəqəsinin yenidən qurulması sərhəd infrastrukturunun imkanlarının yaxşılaşdırılmasına, həmçinin Türkmənistan və Əfqanıstan arasında ticarət və nəqliyyat-logistika əlaqələrinin inkişafına kömək edə bilər.
