Lebap sement zawodynda önümçilik kuwwatyny artdyrmaga gönükdirilen täze önümhana işe girizildi. Kärhanada alnyp barylýan döwrebaplaşdyrma işleri önümçiligiň gerimini giňeltmäge we gurluşyk pudagyny zerur önümler bilen üpjün etmäge mümkinçilik berýär.
Zawodyň ýyllyk önümçilik kuwwaty 1 million tonna bolan ikinji tapgyrynyň ulanmaga berilmegi bilen kärhananyň umumy kuwwaty 2 million tonna ýetirildi. Bu ýerde S-400 we S-500 kysymly portland sementiň, duza durnukly sementiň hem-de klinkeriň dürli görnüşleri öndürilýär.
Kärhanada polipropilen haltalaryny öndürýän täze önümhananyň işe girizilmegi hem önümçilik işleriniň netijeliligini ýokarlandyrdy. Täze önümçilik bölümi zawodyň taýýar önümleri üçin zerur gaplama serişdelerini özünde öndürmäge şert döredýär.
Lebap sement zawodynda önümçilik kuwwatlarynyň yzygiderli artdyrylmagy ýurdumyzyň gurluşyk pudagynyň zerurlyklaryny içerki önümçilik arkaly üpjün etmäge hem-de kärhananyň ykdysady mümkinçiliklerini has-da ýokarlandyrmaga ýardam berýär.
