Türkmenistanda ilatyň saglygyny goramak, lukmançylyk hyzmatlarynyň hilini ýokarlandyrmak we saglygy goraýyş ulgamynyň maddy-enjamlaýyn binýadyny döwrebaplaşdyrmak boýunça işler dowam etdirilýär. Şu maksat bilen Lebap welaýatynda iki sany iri saglygy goraýyş taslamasyny durmuşa geçirmek göz öňünde tutulýar.
Türkmenistanyň Halk Maslahatynyň 23-nji sentýabrda geçirilen nobatdaky mejlisinde bellenilişi ýaly, meýilleşdirilýän taslamalar welaýatyň ýaşaýjylary üçin döwrebap lukmançylyk hyzmatlarynyň elýeterliligini giňeltmäge gönükdirilendir.
Kerkide täze köpugurly hassahana gurlar
Taslamalaryň ilkinjisi Kerki etrabynda täze köpugurly hassahananyň gurluşygy bilen baglydyr. Täze saglygy goraýyş edarasy diňe bir Kerki etrabynyň däl, eýsem, oňa ýakyn ýerleşýän beýleki etraplaryň ýaşaýjylaryna hem dürli ugurlar boýunça lukmançylyk hyzmatlaryny hödürlemäge niýetlenýär.
Etrapara hassahanalaryň döredilmegi ilatyň ýöriteleşdirilen lukmançylyk kömegine bolan islegini kanagatlandyrmaga we saglygy goraýyş hyzmatlarynyň elýeterliligini ýokarlandyrmaga ýardam edip biler. Şeýle hassahanalary ýurdumyzyň beýleki welaýatlarynda hem gurmak meýilleşdirilýär.
Lebapda halkara derejeli onkologiýa merkezi dörediler
Welaýatda durmuşa geçirilmegi göz öňünde tutulýan ikinji iri taslama halkara derejeli onkologiýa merkeziniň gurluşygydyr. Bu merkez rak keselleriniň öňüni almak, olary anyklamak we bejermek boýunça lukmançylyk mümkinçiliklerini giňeltmek üçin möhüm ähmiýete eýe bolup biler.
Onkologiýa merkeziniň döredilmegi welaýatda ýöriteleşdirilen lukmançylyk hyzmatlarynyň ösdürilmegine we näsaglaryň degişli kömegi almak mümkinçilikleriniň artmagyna şert döreder.
Meýilleşdirilýän bu iki taslama Lebap welaýatynyň saglygy goraýyş ulgamyny ösdürmekde möhüm ädim bolup, olaryň durmuşa geçirilmegi ilatyň saglygyny goramak we lukmançylyk hyzmatlarynyň hilini ýokarlandyrmak boýunça alnyp barylýan işlere goşant goşar.
