Lebap welaýatynyň Çärjew etrabynyň H.Hajyýew adyndaky daýhan birleşiginiň kärendeçisi Güllala Rozmuradowa ene topraga yhlasly zähmet siňdirip, bol hasyl öndürmegi öz işiniň esasy maksady edinýär.
Daýhanyň belleýşi ýaly, topraga söýgi we yhlas bilen çemeleşmek, onuň bereketini artdyrmak her bir kärendeçi üçin möhüm borçdur. Çünki halal zähmetiň netijesinde öndürilýän bol hasyl ýurdumyzyň oba hojalygynyň ösüşine goşant goşmak bilen birlikde, ilatyň azyk üpjünçiliginiň pugtalandyrylmagyna hem ýardam berýär.
Güllala Rozmuradowa Garaşsyz, hemişelik Bitarap Türkmenistanda daýhan zähmetine döredilýän mümkinçiliklerden peýdalanyp, öz kärende ýerinde netijeli işlemäge çalyşýandygyny nygtaýar. Onuň sözlerine görä, halk arasynda aýdylýan «Topraga yhlas etseň, toprak saňa altyn berer» diýen pähim daýhançylyk işiniň manysyny doly açyp görkezýär.
Kärendeçi üçin ene topraga yhlas siňdirmek, ony aýawly saklamak we öndürijilikli peýdalanmak diňe bir zähmet borjy bolman, eýsem, Watanyň ösüşine goşant goşmagyň hem ähmiýetli ýoludyr.
