Türkmenistanyň ýaş zehinleri Germaniýada geçirilen mental hasaplama boýunça Junior Mental Calculation World Championship 2026 (JMCWC) halkara ýaryşynda üstünlikli çykyş etdiler.
Bilefeld şäherinde 5–7-nji sentýabrda geçirilen dünýä çempionatynda dürli ýurtlardan 100-den gowrak ýaş hasaplaýjy öz ukyplaryny synagdan geçirdi. Türkmenistanyň ýygyndysynyň düzüminde 12 okuwçy çykyş edip, birnäçe ugur boýunça ýokary netijeleri görkezdiler.
Şolaryň arasynda Türkmenabat şäherindäki ýöriteleşdirilen 41-nji orta mekdebiň 7-nji synp okuwçysy Mekan Nurgeldiýew aýratyn tapawutlandy. Ol 11 ýaşa çenli gatnaşyjylaryň bäsleşýän Junior 1 toparynda 2477 utuk toplap, ýaryşyň bürünç medalyna mynasyp boldy. Şeýlelikde, türkmenistanly okuwçy öz ýaş toparynda dünýäniň iň gowy üçlüginiň hataryna girdi.
Türkmenistanyň wekilleriniň arasynda başga-da birnäçe okuwçy ýokary netijeleri görkezip, 2000-den gowrak utuk toplady. Mental arifmetika boýunça Türkmenistanyň ilkinji milli rekordynyň eýesi Liwanur Berdiýewa 15-19 ýaş aralygynda toparda gowy netije görkezdi we iň ýokary görkezijileri gazanan ilkinji sekiz gatnaşyjynyň hataryna girdi.
JMCWC ýaşlaryň çalt we takyk hasaplama başarnyklaryny ýüze çykarmaga gönükdirilen iri halkara bäsleşikleriň biridir. Ýaryşlarda gatnaşyjylar goşmak, aýyrmak, köpeltmek we bölmek ýaly amallardan başga-da, kwadrat we kub köklerini tapmak, droblar bilen işlemek, sanlary köpeldijilere dargatmak hem-de senenama hasaplamalary ýaly çylşyrymly meseleleri gysga wagtda çözýärler.
Bäsleşige «Kämil» bilim okuw merkeziniň mental arifmetika mugallymlary Jahan Durdumämmedowa bilen matematika mugallym Halym Annagurbanow ýolbaşçylyk etdiler. Olar okuwçylaryň bu derejä ýetmeginde uly zähmet çekdiler.
Türkmenistanly okuwçylaryň dünýä derejesindäki bu bäsleşikde gazanan netijeleri ýaş nesliň matematika we mental hasaplama ugrundaky taýýarlygynyň ýokarydygyny görkezýär. Düýpli taýýarlyk, çalt pikirlenmek we takyk hasaplamak ukyby ýaş türkmenistanlylaryň halkara ýaryşlarynda täze üstünliklere ýetmegine mümkinçilik berýär.
