Türkmenabat şäherinden bolan 7 ýaşly ýaş futbolçy Begzat Izzatow Türkiýäniň meşhur futbol klublarynyň biri bolan «Fenerbahçe» toparynyň ulgamyna goşuldy. Ýaş türgeniň bu üstünligi onuň futbol ýolundaky möhüm ädimleriň biri boldy.
2019-njy ýylda dünýä inen Begzat Izzatow 4 ýaşyndan bäri futbol bilen yzygiderli meşgullanýar. Ol ýaşlygyna garamazdan, türgenleşiklerde öz zehinini, zähmetsöýerligini we futbol baradaky höwesini görkezmegi başardy.
Begzat Türkiýede «Max Performans» akademiýasynda taýýarlyk geçip, akademiýanyň iň ýaş türgenleriniň biri hökmünde tapawutlandy. Onuň futbol başarnyklary we türgenleşiklere bolan yhlasy hünärmenleriň ünsüni çekdi.
Ýaş futbolçynyň karýerasyndaky ilkinji möhüm ädimleriň biri Türkiýäniň «Rams Başakşehir» klubunyň ulgamyna goşulmagy boldy. Indi bolsa Begzat Izzatow üçin täze mümkinçilik açyldy — ol «Fenerbahçe» toparynyň ulgamyna goşuldy.
Bary-ýogy 7 ýaşynda Türkiýäniň meşhur futbol klublarynyň biriniň ulgamynda taýýarlyk görmek ýaş türkmen futbolçysy üçin möhüm tejribe bolup durýar. Begzadyň bu ýoly onuň geljekde futbol ussatlygyny ösdürmegine we halkara derejesinde özüni görkezmegine mümkinçilik berip biler.
Ýaş zehiniň gazanan bu üstünligi Türkmenabatda hem futbol bilen meşgullanýan çagalar we ýaşlar üçin sportuň täze mümkinçiliklere ýol açýandygyny görkezýän mysallaryň biri boldy.
