Lebap welaýatynyň Türkmenabat şäherinde halk döredijiligini hem-de milli mirasy wagyz etmek maksady bilen guralan «Altyn Aşygym alçy gop — 2026» atly dabaraly bäsleşik geçirildi.
Bäsleşikde türkmen halkynyň gadymy oýunlarynyň biri bolan aşyk oýnunyň dürli ugurlary boýunça bäsleşildi. Çärä welaýatyň dürli künjeklerinden medeniýet işgärleri işjeň gatnaşdylar. Guramaçylaryň bellemegine görä, bu çäre diňe bir ýaryş bolman, eýsem halkyň köpasyrlyk däp-dessurlaryny, tutanýerligi we çalasynlygy terbiýeleýän milli oýunlary täzeden dikeltmekde uly ähmiýete eýedir.
Bäsleşigiň dowamynda gatnaşyjylar özleriniň ezberliklerini, çalasynlyklaryny we aşyk atjak mahaly takyklyklaryny görkezdiler. Şeýle hem çäräniň çäklerinde milli sanawaçlar aýdylyp, halk döredijiliginden parçalar we aýdym-sazly çykyşlar ýerine ýetirildi.
Eminler toparynyň netijeleri boýunça bäsleşigiň ýeňijileri we işjeň gatnaşyjylary ýörite hormat hatlary hem-de ýadygärlik sowgatlar bilen sylaglandylar. Ýerli häkimiýetler we guramaçylar geljekde hem şu görnüşdäki milli bäsleşikleri yzygiderli geçirmegi meýilleşdirýändiklerini bildirdiler.
